落雨天的下晡
我攑雨傘 佇植物園散步
行到水池邊
看水中影是無奈的水滴
無奈是水滴的漣漪
我拿出手機仔 對準水面
看著雨點打入池內
細窟的池水大叢的山蘇
翕一張叫作寂寞的相片
翕相翕到厝邊的查某人
伊親像一幅孤單的畫
落雨天的下晡伊攑著雨傘
佇植物園的涼亭散步
看水中影親像是伊的後生
厝內大細項代誌
尪攏替伊作決定
伊應該毋是孤一個人？
寂寞的水邊有寂寞的柳枝
伊的心內隨時有這兩個人
就是攏無伊家己
若有人問伊啥
伊遵照尪佮子講的回答
這是疼痛抑是失去自我？
伊猶原逐日散步感覺幸福
攏無發現家己漸漸無人格
我晃頭這款舊社會查某
有人做家後做母親就歡喜滿足
毋免我操煩無論查甫查某
攏愛先做一個人格完整的人
毋是任何人的附屬品