白色海岸
白色海岸啉咖啡，水接雲天伴境意，
湯匙幼幼沓沓品，海鳥飛來鼻芳味。

有鱟
水下泅踹行海坪，孤鱟對鱟毋通掠，
咱用文明來共疼，自然愈來愈濟隻。

山后民俗村
燕仔開尾剪雲天，十八間厝現古味，
來到金門踅山后，閩南印象入記持。

翟山坑道
翟山坑道迵出海，鐵甲船隻補運踹，
當今轉身觀光來，暗內歌聲熠五彩。

採白沙
馬馱車載採白沙，沙坡勼甲成狹逝，
沙崙減少真毋甘，海濱公園共美化。

海雁來
虔冰堅凍北頂北，海雁南飛一括括，
頭前領隊氣力大，金門供怹食紲蹛。

擉算盤
目鏡仙啲擉算盤，頂珠下珠蟳咧看，
毛筆記數一逝逝，店櫃錢財伊總扞。

工課虎
番薯犁屹賽大箍，別人工半伊做好，
重擔起肩伐大步，規鄉號伊工課虎。

單味藥
細漢看星滿天熠，食老煩惱星少見，
問診得著太空病，空氣污染光點止。
敢通安呢無就醫？治本減碳藥單味。

畚斗起工
下昏掃帚睏畚斗，半暝風聲透透透，
早起落葉規厚厚，掃帚起工掃掃掃，
成垺樹葉入畚斗，捀去牛牢落落落，
肥糞壅著欲應效，牛放屎尿漚漚漚，
過程相紲會相掜，掘屹番薯真大奅。