戇姆婆說：「無啦，我毋是匪諜，遐憲兵毋敢用彼種殘忍的夭壽手段來對付我這個老伙仔。去到憲兵隊的時陣，憲兵就直接共我關囥防空洞，我倒落塗跤就睏，睏甲毋知天光。」
秋菊不平地說：「遐夭壽兵仔哪會彼呢無天量，予妳這個老伙仔睏塗跤，敢講因的良心去予狗咬去。」
戇姆婆據實說：「塗跤有草蓆，也有一領被，可能是防空洞濕氣較重，蓆佮被攏臭殕味、臭殕味，鼻起來毋是滋味。彼陣規個人實在誠悿，我倒落就睏，睏甲毋知通天光。若毋是隊長去叫我起，我可能抑擱咧睏。隊長好心好意欲叫我去食麵頭配豆漿，擱欲叫車載我倒來，我無咧希罕啦！但是我拄拄仔想，可能遐憲兵知影做毋著代誌，彼個夭壽憲兵官嘛來共我賠失禮。我也苦勸伊，毋通欺侮百姓，嘛毋通食百姓夠、夠、夠，若無者，一定會得到報應！彼個夭壽憲兵官，昨暝來查戶口的時陣，大聲細聲咧罵人，無共咱當做人看待，但是今仔日連鞭變款，變甲誠客氣，可能是做毋著代誌予長官罵，才會彼呢好死。」
秋菊坦誠地說：「我透早有去揣連長，請伊共咱湊相共，緊想辦法共妳救出來。」
戇姆婆訝異地說：「原來是按呢喔，可能是連長揣著人，才會遐緊共我放出來，而且隊長擱誠好心，叫我去食麵頭配豆漿，又擱欲開車載我倒來。原來是連長揣人共咱湊相共，咱應該著感謝伊。」（五二）