阮！抱歡喜的心，迎接這括來后湖踏查的老師，恁！用閩南語講鄉土，專業夠夠，技巧了了，為著後代教書出步數，對鄉土教育作貢獻。
有幸作導覽！講屹是機緣，今兒日「本地話本地講」邀后湖對話，本地腔互出味。閩南語講鄉土初況總是扴扴，常講就通順，伊也稱雅言，保存文化的角度看待應重視共推展。金門話「一句來，一句去」講人文談地理，一兼二顧進行今兒日的活動。
后湖社區團隊掠準目標有作為，創寫地方謠、編本土語料、採錄傳統歌謠，編印《后湖唸歌謠》佮《本地話后湖謠》作基本教材，有採錄部份也有創寫的新篇，這過另編研習資料，佇手頭中通看唸兼說明來了解史蹟。
后湖鄉倚山倚海，鄉民本性勤儉樸實；勵志耕讀人才出，拍拚出脫有成就；做海醮登入「金門縣無形文化資產」，是敬拜海上幽魂的宗教活動；百外外年健在的老番花，細漢樹跤聽故事，到今風采猶存；許獬文章萬著才華洋溢，是同安唯一「會元」有「許同安」之稱，故居「鄉賢世第」奉祀「會元祖」香火不斷，代代好數念。這逝文化之旅了解后湖的特殊。
后湖奇葩！許金印好記才成活字典，得金門文化獎，為鄉里添光彩。阮採錄伊唸的歌謠十外首，有「七姑、二九暝、雞角公、搖榕樹、四姊妹、鴉片仙、白賊七、茉莉花、相罵歌、陳三五娘、賣大燈、一枝竹、一點紅、雪梅教子」等，是口頭文學，學伊珍貴的老聲音，共傳唱落去。誠拄好，成員中梓恬老師也是伊的查某囝，引咱登門拜訪耆老許金印本人，聽伊唸謠是享受，伊談后湖事真難得，好運加插一課！
記池中水澤仔叔、元清伯、嘉實叔公、金印叔……怹偌講俚語，就是阮學習的機會，細漢學會響食老記牢牢，像︰「食麥糊配菜脯，祖厝佇後浦；只看針鼻，無看城門；大箍臭抱，細箍無效；一把西定乾，湠一大（土畺）；一魟二虎三沙毛四蜇肚；番仔刣嘉臘，無橫無直；貪俗買狗鯊，俗物無好貨；番仔整逝，袂相佮股；雞母拖秤砣，規日硞硞遨；半暝呻喙焦，捎無滸苔被；唐山講番話，無死亦狼狽；挨山挨海，規鄉褿動；亦欲趁成數，亦欲唬秤頭」，每一句說背景，來了解生活邀俚語的關連性。
壁面磁仔字謠是后湖的驕傲，必然介紹，提〈后湖景〉作例，唸唱加動作來分享，輕鬆理解人文景觀，內容就是︰
九條橋，蹯過溝，西佮南會到。後週仔，溝流沖，鬼故事佇形。
白菜路，一馬墓，灰煞一大模。鳥井空，深窿窿，碗藥搤矣憨。
赤仔埔，抾牛屎，曝日藃閣反。佇下厝，西樂隊，湖光真夠氣。
去石厝，看電影，軍民捙颺颺。網寮路，擔魚聲，跤手捷搤搤。
沙坡頂，曝大網，過午就焦鬆。大露東，中大熕，掠魚省走傱。
看烏礁，水反拋，合圍無阿差。石頭頂，仙腳跡，耍水來遮避。
大坑溝，覕壁洞，內身否紲動。老番花，竹篙抐，七夕拜娘媽。
近下晝行完全程，114年11月16日特別有意義，「浯島踏查后湖場︰鄉土連通路這逝來后湖」總規結果，今兒日貼落一片金門文化的拼圖。共同目標，相教相學，應閣起步，往他鄉探訪，一步一步咱咧愛鄉土。