金門是一個小所在，自古民間文化氣息誠厚，文武進士著有四十外個人，其中佇明朝的時陣，蔡厝有一家人得著一個「七鶴真脈」的風水寶穴，因為即家人毋守信用，違背著風水師的約定，風水師誠生氣，著假講風水出了問題，墓壙裡有水聲絳絳吼，著愛緊挖起看覓，一挖下去，看到七隻白鶴對墓壙裡飛出來。風水師不忍心看著蔡的即家無得半項，就叫下腳手人趕緊去逐，下腳手人一緊張，著舉鋤頭掃帚去逐，最後拄拄佮逐著一隻，因為予下腳手人亂拍亂摃，傷到彼白鶴的一朵目睭，共一支翅，參一支腳，又閣滿臉的血。聽講其他的白鶴著四界飛，有一隻飛去青嶼、一隻飛去後浦、兩隻的飛去古區共賢厝，一隻飛去圍頭，另外一隻飛去內地，不知飛去佇兜位。過了無外久，姓蔡的即家著生一個查埔囝仔，一出世著一目看無、一腳跛跛，貓臉又閣曲痀，其實著是彼隻伊就是白鶴來投胎的，大漢了後做官做到五省經略，皇帝閣賜伊尚方寶劍，這著是幾百年來一直是金門人傳頌的先賢人物蔡復一，也就是咱所識似的「七鶴戲水」的故事。
有一擺，宰相石星因為偷換公文犯著欺君大罪，蔡復一奏請皇帝欲斬石星。皇帝因為有私心沒准，但是有講過：「若要斬石星有三個條件：第一日毋刣、夜毋刣；第二見天毋刣、見地毋刣；第三就是城內毋刣、城外毋刣；另外斬石星了後，著放三門大炮。」想講蔡復一一定不法度通刣石星的，蔡復一一聽嘛知影皇帝毋甘刣石星，蔡復一為著欲公正無私，日也想暝也想，著撿佇子丑相接的時陣，將石星押去甕城裡行刑，又閣放三門大炮。皇帝聽著炮聲欲趕來救伊，已經袂赴啊！若毋蔡復一這巧，著無法度通刣死即個奸臣。
閣有一擺，蔡復一欲去上任，(人因)夫人隨伊鬥陣去，當時踮驛館請客，華陽王送伊一甕酒，甕口封阿密密密，又閣重錘錘，(人因)夫人感覺待事有淡泊阿怪怪，著趕緊入去房間給蔡復一講，蔡復一當場著開封口，發現甕裡攏是金銀財寶，馬上就將遮甕酒退還予華陽王，人講：「翁清廉，嘛著某清廉」，又閣講：「枕頭咒，死無救」，欲相挲攏會去揣查某人，(人因)翁某誠實無簡單，看著錢銀攏袂欲貪。
對這兩項代誌來看，蔡復一是個真公正又閣清廉的好官，咱的政府若有這款的官員來為咱做代誌，百姓一定會足幸福的。咱若有機會通做官，著愛學蔡復一這款人公正閣袂貪，來為百姓做代誌較對。欲娶某著娶親像蔡復一(人因)夫人即款袂貪錢的，才袂怎樣死的攏不知。
（稿件由金門縣政府政風處提供）