南海風勻勻仔吹，白茫霧沓沓仔罩來，青翠的山園麥穗累累，一陣人大大細細嘻嘻嘩嘩，手捾勾籃，離開鄉里，行過園岸，來到海墘邊。花崗石大姆塊橫佇眼前，若親像騷蟳趕蟹的化石。「南海夜臺」--南海公永夜長眠的所在，靜靜臥佇遮，一暝過一暝，一年擱一年。
大人喝聲，對下坑、山外、東洲、高坑、新前墩各鄉社趕到來的兄弟叔孫，有的除草，有的清墓桌，有的掛墓紙，嘻嘩聲、炮仔聲拍醒塵封的漫漫歷史。
一炷清香、三鞠躬了後，大家沿石蟹的山勢懸低坐落來，聽陳先生講古，綴著金紙燼矣的清煙升起，行入六百年前的明朝時空：
「咱六郎公對宋朝尾來下坑開基。六百外年前九世祖陳顯，外號南海公真才情，伊是金門明代中舉的頭一人，『開科第一』的燈號猶懸懸掛佇祖厝內。伊佇河南、山西、山東做過三任知州，後來調任直隸北平州。彼陣的燕王真惜伊的才，請伊擔任機要秘書，南海公早就看出燕王有企圖，就利用兩人行棋的機會，巧妙的苦勸，毋過燕王想欲篡位的心意已決。南海公只好家己託講身軀毋好，辭官到來故鄉，過著鄉野清閒的日子。
無偌久，燕王篡位做皇帝了後，特別派人來金門，想欲請伊上京鬥相共。南海公是讀書別情理，有情有義的忠厚人，面對皇命大啊若天的，只好選擇家己服毒自盡。
出葬的彼日，一陣風將引路的紅燈仔吹來海墘大石頭面頂，風水師看了，講：「進前三相才，退後萬人丁」。祖婆心想：「佇朝廷做官，厝內麻是有一頓無一頓，米缸定定是空的，猶是人丁興旺較實在」棺材入壙彼時，天邊烏雲斜來，雷聲霆電火著，大石擘開裂出一條縫，風水師怨嘆講：「可惜呀！可惜呀！眼前這風水破矣，萬人丁猶有，毋過攏會出外發展啊。」
轉北風啊！罩霧沓沓仔開啊！日光迵過薄雲斜照坐佇石蟹面頂的囝孫，一個一個勻勻啊起身伸伨，樸實的面容綻著文文仔的笑容，一時陣若親像南海公擱出手共咱扞，燒囉咱的心頭定。望向南海天邊起飛的飛機，飛向澎湖、台灣、大陸、馬六甲、新加坡、美國、加拿大……等世界各地開基散葉，一代一代大大細細囝孫的血脈，流傳著南海公忠貞不二，公義而行的硬氣，有著堅韌的肩頭，承擔開拓，各行各業來拍拚，一個一個出頭天。（稿件由金門縣政府政風處提供）