風獅爺囊入去衫仔褲
啥物布質攏會使
因為目睭的空縫使伊
一直咧拍咳啾

風獅爺幔上衫仔褲
只要會使閘湧和覕雨
啥款色水攏會使
因為直直咧搧風
連石頭嘛是會來感冒，

伊只是欲穿有衫仔褲
恁煞以為會來受寒閣受邪
所以「時時」咧
拆衫兼脫褲

（好親像向望了後毋是欲行向艱苦
無的確攏莫有向望，期待才袂來「轉型」）

喙齒凍甲有淡薄仔痛
是毋是愛挽出去
就袂閣有目屎；

伊只是欲穿著衫仔褲爾爾
怎樣會閣來風波
抑是講
咱的話語才是
雨湧、感冒、邪寒、風波
拍咳啾


註：本台語詩之用字皆參考教育部《台灣閩南語常用詞辭典》