「阿母，添丁仔伊欺負我……。」阿滿仔委屈地說。
「汝大人大種，歲聲大添丁仔足足四歲，伊是欲怎樣欺負汝咧？天公祖咧頭殼頂，汝毋通亂亂講，若無者，汝會予雷公敲死！」阿乞嬸怒指她說。
「伊共我衫褲脫光光，強我啦！」阿滿仔再也忍受不住，據實地說。
「撖有影按呢？撖有這款代誌？汝毋通亂亂講！」阿乞嬸仔疑惑地說。
「阿滿仔從來毋捌講白賊話，若是無影，伊撖會親彩講講矣！添丁仔這篩衝囝，一日到暗欲食毋討趁，做賊、拔繳、相拍、淋酒逐項來。今仔日竟然做出這種僥倖失德的代誌，恁爸若無共拍予半命袂煞矣！」阿乞叔仔說著，轉身想找添丁仔算帳，卻被阿乞嬸仔攔住。
「咱較早就有予因兩個做大人的拍算，今仔日既然發生這款代誌，咱就提早共因兩人做大人，予因結成尪某。毋通共這項代誌四界去講，若是予人知影，是咧加見笑矣。」阿乞嬸仔提醒他說。
「生生這箍衝囝無潲路用啦，是咧予我加氣痛矣！」阿乞叔仔氣憤地說。
「添丁仔物代會做這種代誌，可見伊對阿滿仔老早著有意思，才會三更半暝走去伊的房間佮伊親密。話閣講轉來，阿滿仔若是無意愛，物代欲恬恬予伊脫衫、脫褲？物代毋大聲喊救人？物代欲定定佮伊相好？我想因兩個已經大漢啦，老早著互相意愛啦！」阿乞嬸仔神情怡悅地說。
「代誌撖有像汝講的彼呢單純，若是按呢，阿滿仔物代會哭仔彼傷心，一定是添丁仔這箍衝囝欺負伊，硬硬共伊強的啦！」阿乞叔仔不屑地說。
「汝毋通家己的囝毋顧，偏偏欲替彼個夭壽新婦仔講話，按呢對咱有啥物好處？啥物話攏毋免講，緊予因兩個做大人較實在。萬一若有身，彼聲就大聲。」阿乞嬸仔顧慮地說。
「這箍了尾仔囝會做出這款傷風敗俗的代誌，攏是汝共伊寵歹去的啦，若無袂變這種形勢！」阿乞叔仔激憤地說。
「囝是汝生的，汝毋通東怪西怪，拄拄怪我一人！汝撖有良心、撖有良心？撖講汝的良心去予狗咬去、去予狗咬去！」阿乞嬸仔得理不饒人，大聲地說。
「阿滿仔是汝育來飼的新婦仔，汝物代欲共伊罵、共伊拍、共伊捻，予伊食臭酸糜，共人苦毒！汝的良心才是去予狗咬去！」阿乞叔仔不屑地說。
「過去的代誌毋通閣講好毋？伊若是佮添丁仔做大人，以後就是我的新婦，我一定會疼惜伊。」阿乞嬸仔低聲地說。
（一八）