「海嫂仔看起來嘛是誠忠厚，啥物人想會到，伊會三更半暝去伙伕間、揣伙伕班長食麵頭配豆奶？」闊喙玉仔說。
「海嫂仔較早毋是有講過，伊講（亻因）兜彼隻死老猴，七少年八少年就袂用的啦，老早就無膏啦，想欲共抽，嘛抽無物件。恁會記的伊講這句話袂？可能也是按呢，伊才會三更半暝去伙伕間、揣伙伕班長食麵頭配豆奶啦！」豬母也不屑地說。
「羊哥嫂仔，汝看起來嘛是誠忠厚，有三更半暝去伙伕間、揣伙伕班長食麵頭配豆奶無？」闊喙玉仔開玩笑地說。
「阮翁到這陣，抑是一尾活龍，一暝到光，攏嘛予伊吵半死，像我這款阿嬤體格，實在凍伊袂條。予恁兩個講，我撖抑擱有彼才調，三更半暝去伙伕間揣伙伕班長？講一句實話，伙伕班長彼粒麵頭，較適合海嫂仔食啦！恁撖無發現著，海嫂仔奶大尻川翹，又擱桃花臉。恁撖毋捌聽過，桃花臉的查某興頭啦！尤其是（亻因）翁七少年八少年就袂用的，才會三更半暝去揣伙伕班長啉豆奶。講起來真實會笑死人！」羊哥嫂仔笑著說。
「翠英少年的時陣，嘛是奶大、尻川翹、桃花臉，副營長大伊一二十歲，可能嘛毋是伊的對手。」豬母也說。
「副營長退伍來予翠英招的彼年，歲聲已經袂少啦。可能較早佇部隊的時陣，去軍樂園開了了，老早就無膏啦，才會無擱生囝。」闊喙玉仔說。（二一）