「逐家毋偌是仝村，也是仝宗，若是無一點同理心佮同情心，按呢就無意思，其他講傷濟也無路用。汝著好好保重身體，除了去山作穡外，抑有兩個囡仔需要汝來照顧。尤其是志清佮志勇， （亻因）一日一日杳杳咧大漢，攏著靠汝母兼父職來教示，將來才會成器。想欲共囡仔飼大也毋是彼容易，培養子女成材擱較無簡單，兩項攏著付出真大的心血佮代價，所以為著兩個囡仔，汝著共身體調養予好，才有教示囝兒成器的本事，才有上山作穡、飼一家大細的本錢。」福生哥苦口婆心地說。
「福生兄，感謝汝的提醒佮鼓勵，想袂到肺病的傳染力竟然彼呢強，難怪鄉里人知影元富得著這種病症時，攏閃甲遠遠遠。雖然我無醫學常識，毋知影通防患，但是身為伊的家內，擱較怎樣也著守佇伊的身軀邊，袂使為著家己無管伊，予伊自生自滅。若是按呢，對家己的良心嘛袂咧過！雖然我予伊傳染著，毋拄會使證明我對伊是不離不棄，也是佇伊身軀邊，才會予傳染著。
福生兄，長久以來，若毋是汝共我湊跤手，山頂彼田園可能已經荒廢成草埔；若毋是汝的苦勸，無緊去看醫生，予病情惡化，可能已經去陰間佮元富作伴，到時放兩個囡仔無人通管教，才是人間上大的悲劇。所以我一定聽汝的話，共身體調養予好，才有體力上山去種作，才有精神教囝成材。」秋霜說後，露出一絲淡淡的微笑。（一三）