「著，就是按呢，按呢就是人生的態度。無管歷經偌濟苦難，攏著有活落去的勇氣，才對得起飼咱大漢的爸母。我佮元富的交情汝是知影的，今仔日伊雖然已經離開咱，但身為伊的朋友，對伊留落來的某囝，一定著隨時來關心，才對得起老朋友。但是人的喙誠惡毒，所以我考慮再三，抑是較少來恁兜行踏較好，以免造成汝的困擾和精神上的負擔。尤其是玉卿賭氣倒去（亻因）外家已經幾落個月啦，毋通予人誤會伊無佇厝的時陣，我經常佇恁兜咧出入，可能是對汝有啥物不良的企圖，若是按呢就毋好。」福生哥有所顧慮地說。
「福生兄，汝想傷濟啦，彼食飽傷閒的人欲怎樣講，就隨（亻因）的便，咱若心肝內無鬼，是咧驚啥物？汝較早經常佇阮兜咧行踏，若是突然間毋來，毋是擱較會予人懷疑？依我的看法，汝就親像較早按呢，大大方方的行入來，光明正大行出去，看彼八卦婆，抑擱有啥物話通講！」秋霜不在乎地說。
「汝講的也有道理，咱若問心無愧，就無啥物通好驚的。我盡朋友的責任，共汝湊相共，天公祖嘛金金咧看，我想伊也會認同我的作法。若是彼食飽傷閒的人毋知通收煞，敢擱亂亂講，各人造的口業各人擔，將來死後落地獄，一定會予牛頭馬面掠去割喙舌！」福生哥不屑地說。
「汝有這種想法就著啦，元富得著肺病的時陣，汝除了去醫院共伊提藥，也毋驚會予伊傳染，經常撥工來看伊，這份恩情我秋霜永遠記囥心肝內。」秋霜由衷地說。
「我人大箍身體粗勇，抵抗力強，所以肺癆的病菌不敢接近我，也是我不驚予伊傳染的主因。但是汝長時間佮伊湊陣，身體又擱較衰弱，予伊傳染的機率會較懸。佳哉早日發現，早日治療，才會佇短時間內好起來，實在是汝的福氣啊！」（一四）