「我若毋是早日發現，若拖到第三期、欲死毋死，一定會比元富抑擱較悽慘。」秋霜落寞地說。
「怎樣講？」福生哥不解地問。
「元富破病期間，我暝日佇伊身軀邊咧照顧伊，但是今仔日若是換我破病倒佇眠床頂，有啥物人通暝日來照顧我？雖然我有兩個囝，毋拄（亻因）抑擱細漢毋捌世事，可能連倒一杯滾水予我啉也有問題，毋免數想（亻因）欲來照顧我。親情朋友若是聽著肺癆兩字，一定會驚死，有啥物人敢主動來關心。汝雖然是元富的好朋友，替我去醫院提藥沒問題，替我犁園種作也沒問題，其他方面有真濟真濟的無方便。福生兄，汝講著毋？」秋霜無奈地說。
「汝講的無毋著，有真濟所在，有時想欲共汝湊相共也無伊法。所以汝著好好保重，將來若是志清佮志勇兩個兄弟仔大漢，就袂會有這種問題。」福生哥鼓勵她說。
「（亻因）兩個兄弟仔，會使講是我日後上大的倚靠，所有的希望攏寄望佇（亻因）兄弟仔的身上。但是毋知何年何日才會共（亻因）飼大漢，才會予（亻因）來照顧我這個歹命的老母。」秋霜感慨地說。
「時間咧過誠緊，囡仔攏是佇不知不覺中大漢。爸母的衰老，換來囡仔的成長，這也是必然的。但是汝這陣抑袂到衰老的時候，所以囝兒抑未成年，也是必然的。若欲叫一個未成年的囡仔來照顧汝，是無可能的代誌。秋霜啊，較緊共身體調養予好，才有氣力共囡仔飼大漢。」福生哥再次鼓勵她說。
「憑我這個軟弱的查某人，想欲共囡仔飼大漢，實在毋是彼呢簡單，拄了會使行一步算一步。希望（亻因）兄弟仔家己會爭氣，毋免予我這個歹命的老母來煩惱就好，其他的我毋敢戇想，也毋敢寄望啦。」
（一五）