「人生海海，我佮恁老爸也老啦，靠汝一個查某人食水也有困難，毋免數想有五穀通食。講實在的，這個家若無一個像塗猴這種粗氣大力的查甫人，也是袂用的。我贊成汝的想法，佮伊好好相處，作穡人只要好跤好手，規矩擱搰力，賰的就毋免計較傷最。雖然較早看著塗猴彼個歹看臉，實在是袂順眼，毋拄這陣看習慣啦，無管是馬臉抑是暴牙，嘛是予人感覺誠親切。尤其伊認真搰力咧種作，受到真濟鄉里人的呵咾，咱心肝內嘛感覺誠歡喜。較早咱母仔囝的目睭真實去予屎糊著，袂曉看人，袂曉分好歹；忠厚共人看著戇神，軟塗擱欲深掘，食人夠、夠、夠，實在不應該啊！」狗屎嬸仔後悔地說。
「阿母，我這陣也有這種感覺，已經無親像較早彼呢怨恨伊，但是伊知影咱不時會用話來酸伊，會使講無一句好話，所以伊誠少佮我講話，後次毋知欲佮伊講啥物，毋知欲怎樣開喙。」春嬌擔憂地說。
「汝毋免煩惱，翁仔某倒落眠床，棉被若蓋落，話母就來啦，毋免驚無話通講。」狗屎嬸仔提醒她說。
（三九）