風獅爺
鄉里外身伊孤單，天寒雪凍想揣伴。
耳仔夯夯鼻大大，目睭吐吐喙闊闊。
大風擋佇鄉里外，妖魔鬼怪咇咇掣。
拜拜對咱金金看，威風凜凜披風幔。

耙龍船
五月五，來到雙鯉湖。耙龍船，頂晡紲下晡。
捷搤搤，挵鼓賽大聲。出手勢，抾合出力拚。
同齊心，目色準頭前。搶著旗，差無半秒時。
得著獎，規會捙颺颺。勇確確！大實力欸贏。

過中秋
中秋時，月娘圓。買月餅，選口味。
文旦柚，當是時。塗仁粿，紅吱吱。
拜月娘，佇深井。提故事，來講起。
大細漢，笑咪咪。光映映，家團圓。
囡仔囝，準會記。好流傳，年接年。