「恁明川忠厚擱搰力，外才嘛袂歹，鄉里人攏嘛咧呵咾，但是媒人毋是一日兩日就做會成的。講一句較歹聽的，汝欲探聽人，人嘛欲探聽汝；查甫爿欲探聽查某爿，查某爿嘛欲探聽查甫爿；有時嘛欲探聽雙爿的爸母，看是妥直、抑是絞怪。雖然媒人著一逝來、一逝去，行真最逝，有時行甲跤骨痠也做袂成，有時雙爿攏妥直，一下就好勢。講實的，媒人錢毋是遐好趁的。」罔腰姑仔滔滔不絕地敘述媒人的苦處。
「這點我知影啦，阮兜拄拄三個人爾爾，會使予人探聽的。我欲娶的新婦，媠佮歹看袂要緊，賢慧勤儉就好，無啥物通撿的。雖然媒人錢歹趁，毋拄是咧做好事，嘛是親像咧做功德。罔腰姑仔，汝做彼呢最的好代誌，天公祖一定會保庇汝，將來會出好囝孫。」翠英誇讚她說。
「咱隔壁村有一個查某囡仔叫素梅，出世無偌久，（亻因）老爸就去番爿趁食，每月攏有寄錢倒來，是（亻因）老母共伊飼大漢的。素梅小學畢業就無繼續擱讀落去，大漢了後就佇（亻因）兜煮糜、洗衫，飼豬、飼雞鴨，整理內頭，（亻因）鄉里人攏嘛呵咾伊搰力、勤儉又擱伶俐。聽講有人去欲共伊做親情，但是（亻因）老母袂佮意，講（亻因）兜人最複雜，欲揣一個家庭較單純的。（亻因）老母一次兩次攏是按呢講，以後就無人敢擱去做親情啦。講實在的啦，若是有通娶著這款查某囡仔來做新婦，是福氣啦！」罔腰姑仔說。
「罔腰姑仔，若是親像汝講的按呢，拜託汝撥一時仔工、去佮（亻因）老母講看覓。阮兜講起來也誠單純，阮囝伊也是規規矩矩認真咧種作，我敢共伊保證，若是嫁來阮兜，袂予伊傷艱苦啦。罔腰姑仔，這個親情若是講會成，到時我紅包一定會包較大個的，絕對袂予汝傷歹看。」翠英認真地說。（一六）