「這箍海嫂仔上歹料，伊莫來上好。家己袂見笑去討伙伕班長，擱好意思講別人。咱有時咧講翠英佮副營長的閒仔話，伊攏嘛一五一十去共翠英講，予翠英對我有淡薄仔誤會。像伊這種學話婆仔，實在有夠夭壽矣！」豬母也說。
「驚啥物，咱是咧講閒話，也毋是咧罵伊。實際上咱講的嘛是有淡薄仔臭破味，也毋是完全無影，若是有影就毋免驚人講。但是海嫂仔若是添油加醋去共伊學話，抑是橫的直的、有的無的，無影無跡講講一大堆，若按呢，實在是夭壽骨！」闊喙玉仔不屑地說。
「咱每一次咧開講，攏是王爺講白話，毋驚天知地知。毋拄一樣米飼百樣人，有人就是愛講人的尻川後話，尤其是學話婆仔彼款人擱較顧人怨。咱後次莫擱佮海嫂仔彼種嬈查某湊陣，若無會打歹咱的名聲。」羊哥嫂仔說。
「羊哥嫂仔講了有道理，海嫂仔討伙伕班長是伊的代誌，毋通予人誤會咱佮伊相款，若是按呢就衰一世人、衰甲去共王爺牽馬，嘛無法度佇這個鄉里佮人徛起！」豬母也咬牙切齒地說。
「好啦，咱莫擱講海嫂仔彼個嬈查某的代誌，是咧加氣身惱命的。逐家喙齒磨較利的，準備通來去予翠英佮副營長請啉燒酒、食好料。」闊喙玉仔說。
「毋通數想彼有的無的，無定著伊拄欲請查甫、無欲請查某，到時就看有食無癮仙哥，焦焦癮啦。」羊哥嫂仔說。
「咱鄉里若是有人咧嫁查某囝、抑是咧娶新婦，攏嘛一家請一個查甫、一個查某，毋捌看著拄拄請查甫、無請查某。羊哥嫂仔，汝毋免煩惱，一定有汝的份啦！」豬母也笑著說。
「有我的份，嘛有恁兩個的份。時到咱三個才相招坐仝桌，燒酒一杯一杯沓沓啉，啉予馬西馬西；好料一碗一碗沓沓仔食，食予碗底向天，予翠英無菜尾通送人。」羊哥嫂仔精打細算地說。
「羊哥嫂仔，看汝一個忠厚忠厚，想袂到步數彼呢最。」闊喙玉仔消遣她說。
「忠厚、忠厚，忠厚一箍鬼啦，擔屎無偷食爾爾；忠厚是人激的，恬恬食三碗公半啦！」豬母也看看她，開玩笑地說。（二○）