十萬的駐軍，貨物靠船運。胡璉新政策，燒酒好節準。
蘆黍交換米，一斤換一斤。經濟有根本，百姓得福份。
作穡人就山，大牛犁出溝。掖籽綴尾後，捅青來等候。
約量半尺懸，欲來芟互開。欉仔離鬆鬆，芟屹誠省工。
有的密閃閃，芟矣誠是悿。見大節無出，討栽去就近。
即過壅落肥，雨來青噴噴。凸粒蘆黍穗，覘覘覘展開。
蘆黍誠是懸，出手揪落來。拐仔刀割屹，菜刀趨勢刐。
規垺擁來縛，動著離落落。貯矣滿出車，到第相接卸。
巷仔兩頭圍，蘆黍內底摔。
粒袂跳出巷，歇睏亦有工。
糝頭糝精出，喙焦去啉水。
有風勢通汲，畚斗拄來抔。
入袋囥迄廳，明日扛去埕。大日一直曝，烘矣粒紅紅。
咬落有夠脆，會使貯入袋。袋喙紩密密，坦倒好相疊。
相疊有墊枋，加圍原子網。
鳥鼠無咬空，逐包都相款。
鄰長來通知，蘆黍換大米。
酒廠出貨車，作業佇大埕。
蘆黍鋟來試，度計記焦離。
偌是袂通過，才來相分會。
大日閣再曝，欲換出鄉社。
換矣食有賰，過濟換錢銀。
有的幾十擔，有的誠百斤。
輸人毋輸陣，墾荒出力拚。
歹的亦著講，經驗拍攏通：
欠肥袂起氣，香枝芒仔命；
風颱偌是來，規坵大敗害；
含莓曝矣焦，汲走免秤重；
收成無鬥幫，鳥仔食空空；
噴藥無到工，龜蠅來抦弄。
當今無相款，矮稈會擋風。
烏土肥助贊，淹水濟人工。
機械夠立捷，種矣規山坪。
出收人就知，種作夠厲害！
一冬過一冬，福氣金門人。
尚好的酒芳，得獎品牌紅。
研究好發展，名聲世界顯。
當年的創辦，感恩感恩啦！