相信足濟捌去金門（辶日）迌的人攏和我仝款有這種感覺，就是金門的日頭誠燄，天氣誠熱，磅空誠濟，風景真媠，貢糖足好食，海產誠鮮，高粱酒真好啉，麵線吃蚵嗲閣袂死鹹，炸彈鋼刀有夠利閣耐用……等等。毋過，除了遮以外，我這鹿港查某囝對金門的台語閣有一種特別的親切感，金門的臺語和阮鹿港仝款攏有一種特別的海口腔，雖然，有一寡仔物件講法無仝，毋過，足濟腔口攏足相仝。這嘛是我佇金門（辶日）迌的時，上佮意去找一寡老輩開講的緣故，因為，共怹講話就親像和厝內序大人說話仝款，遐爾親切。
金門給我印象深的所在足濟，除了較早戰爭挖乎國軍覕的遐坑道以外，閣有足濟古早式的厝，佇我騎機車烏白踅的時陣，攏會當鼻到鹹鹹的海風，參觀夫妻魚培育中心的時，抑了解著鱟的一寡知識和特性。毋過，佇我頂一擺去金門（辶日）迌的時陣，予我印象上蓋特別的所在是金門總兵署。「金門總兵署」原本叫做「叢青軒」，後來，佇1682年（康熙21年），總兵陳龍共改名號做「總兵署」，到今已經有三百多年的歷史矣。伊嘛佇咧1991年11月23日被列為國家三級古蹟。雖然，經過幾若擺的整理佮翻修，猶原保留伊大部分的貌樣。
可能有足濟人捌綴解說人員佇暗頭仔踅大街小巷的時陣，捌去過金門總兵署，伊紅記記的外觀，看起來袂輸敢若一間普通的廟仝款。行入內底就會發現伊的清幽的環境，有淡薄啊親像古早的學堂。足濟人毋知總兵署大堂下跤有一个真趣味的所在，就是往過關押犯人的地牢。咱若對大堂邊仔的樓梯行落去,就會當看到一寡蠟像，有清朝的軍官，押犯人的兵仔佮咧審問犯人的大人，往前行幾步仔，就會當看著一个憂頭結面的犯人跪佇遐籠仔內，袂輸咧講 ：「冤枉啊！大人~」，雖然，雄雄看著，會予人驚一趒，毋過佇遐參觀，袂輸生活佇古早時代仝款，有夠心適。
離歇熱結束差不多擱有一個月，佇全世界熱到快衝煙ê八月天，你若是無想欲出國，會使考慮去金門（辶日）迌。愛會記喔，你若去金門，毋通干焦會曉綴人去坑口吹免費的天然冷氣爾爾，閣愛會記得去參觀這个心適閣充滿古早味的所在喔！